«Һалан хадһлсн дууч»: хальмг олн әмтнә шүлгчин Эрнҗәнә Константина тѳрҗ һарсна 110 җилин ѳѳнд

«Һалан хадһлсн дууч»: хальмг олн әмтнә шүлгчин Эрнҗәнә Константина тѳрҗ һарсна 110 җилин ѳѳнд

Хальмг олн әмтнә шүлгч Эрнҗәнә Константинә 110 җилин насна ѳѳн эн җилд темдглгдҗәнә.

«Һалан хадһлсн дууч» нерәдлһтә болсн поэтическ кичәлд Бичкдүдин центрин кѳдләч алдр шүлгчин бәәдл-җирһлин болн үүдәлтин тускар, энүнә насн-җирһлин хаалһд ямаран зовлӊг чигн болн байр чигн учрсн тускар, хальмг таӊгчдан кесг ач-тус кесн болн шүлгчин үлдәсн зѳѳрин тускар Элст балһсна 17-гч тойгта дунд школын 6-гч классин сурһульчнрт тодрхаһар келҗ ѳгв.

Кичәлин йовудт сурһульчнр «Когда-нибудь тюльпанами взойду…» презентац, Эрнҗәнә Константинә сәәхн хальмг келәр умшсн шүлгүднь болн «Кѳгшн уласн» гидг шүлгтнь айс орулҗ авад, ду дуулад бичҗ авсн аудиозапись соньмҗтаһар соӊгсҗ хәләв.

Эрнҗәнә Константин - Хальмг таӊһчин комсомолын Э.Деликовин нертә мѳрән лауреат, хальмг урн үгин литературт, Əрәсән литературт эврә туслӊ тәвцән орулсн тѳләднь «Ингллтин» орденәр ачлгдсн бичәч. Энүнә үүдәсн хойр ботьта «Һалан хадһл» гидг роман, «Аӊһучин кңвүн» гидг түүкнь, «Элстин уласнд» гидг поэмнь, «Цецн булг» гидг зокъялнь - хальмгин сойлын, урн үгин литературин кѳрӊгд алтн зѳѳр болҗ тохрв.

Насн-җирһлән, теӊгр хәәрлсн билгән Тѳрскндән нерәдҗ, күӊкл чееҗтә, хурц мергн келтә мана ууһн нег шүлгч Эрнҗәнә Константин олн санлд, хальмг литературин байн тууҗд мѳӊкрх нер авснь зѳвтә.

16:10
549
Нет комментариев. Ваш будет первым!
Мы используем cookie. Это позволяет нам анализировать взаимодействие посетителей с сайтом и делать его лучше.
Продолжая пользоваться сайтом, вы соглашаетесь с использованием файлов cookie.