«Зѳргтә йовдлын хаалһар»: хальмг хәәртә үрн, Советск Союзин Герой Николай Мартынович Санджировин 100-җилин ѳѳнд

«Зѳргтә йовдлын хаалһар»: хальмг хәәртә үрн,  Советск Союзин Герой Николай Мартынович Санджировин  100-җилин ѳѳнд

Тѳрскән харсгч Алдр дәәнд залу-зѳргәрн нер һарч, Хальмгин нериг туурулсн баатрмудын негнь - Николай Мартынович Санджиров. Днепр һолын кѳвәд цергчнрләрн хамдан зѳргтә кевәр дәәлдәд, дәәнә даарлһвриг күцәһәд, цергин диилврт ик тәвцән орулсн Советск Союзин Герой Николай Санджировин 100 насна ѳѳн эн җил күцҗәнә. Ончта эн ѳдрин ѳмн А.М. Амр-Санана нертә келн-улсин дегтрин саӊгин кѳдләчнр Н. Санджировин санлд нерәдсн керг-үүлдвр давулсмн.

«Зѳргтә йовдлын хаалһар» нерәдлһтә тууҗин кичәлд ИОЦ келн-улсин әӊгин кѳдләч баатрин намтрин тускар, дәәч хаалһиннь болн зѳргтә йовдлмудын тускар Элст балһсна классическ гимназин 9-гч классин сурһульчнрт тодрхаһар келҗ ѳгв.

Ах лейтенант Н.М. Санджиров 1921 жилин сентябрин 29-д Баһ Дѳрвдә Цаһан-Нур әәмгт тѳрсмн. Школын хѳѳн Дубовск педучилищд сурад, 1941 җилд терүг тѳгсәв. Тѳрскән Харсгч дән эклхд цергә инжерн училищд орҗ сурв. Цергә сән белдвр училищд авад, Санджиров фронтд 1942 җилд тусла. Лейтенант цолтаһар дәәг экләд, кесг дәәлдәнд орад, взводын командир болҗ дәәлдв. Зѳргтә командир минермүдиг һардҗ йовсмн. Цергчнртән сән үлгүр болад, Николай бийнь дәәнә һалын нүүрт йовсмн. 1943 җиләс авн дәврлтин кесг дәәлдәнд ах лейтенант Санджировин взвод хортна долан миӊһ һар минмүдиг олҗ уга кеһәд, мана цергин дәврлтд ик дѳӊ күргсмн.

Днепр һолыг һатллһар болсн ик дәәлдәнд Санджировин взвод нег үлү ончрсн билә. Эн дәәлдәнд диилвр тетклһнд цергчнрән чадмгар залсндан, баатр-зѳрмгәр дәәлдсн тѳләдән Николай Санджиров Советск Союзин Геройин нер зүүсмн. Залу-зѳрмгтәһәр дәалдҗ йовсн ах лейтенант Санджиров Ленина, Александр Невскийин, Тѳрскән Харсгч Алдр дәәнә негдгч девсӊгин болн Улан Одн орденмудәр ачлгдсмн. 1944 җилд Польшд болсн дәәлдәнә йовудт зѳргтә ах лейтенант Николай Санджиров әмнәсн хаһцсмн. Болв, тѳрскнәннь тѳлә әмән ѳгсн итклтә үрн, Советск Союзин Герой Николай Мартынович Санджировин нерн оньдинд мана седклд үлдх. Баатр зѳрмг йовдлын тускар мана нернь туурсн хальмг бичәчнр шүлгүд, поэмс болн дуд нерәдәд бичсмн. Теднә дунд В. Нуровин «Мѳӊкрлт» поэм, В. Чурсовин «Баллада о Санджирове» болн нань чигн.

Кичәлин йовудт Элст балһсна классическ гимназин 9-гч классин сурһульчнр «Освободители», «Битва за Днепр», «Золотое созвездие Калмыкии» гидг видеофильмсин тасрхас соньмстаһар хәләв.

Мана хѳвтә бәәдл-җирһлин тѳлә әмән ѳгсн хальмгин үрнә, Советск Союзин Герой Н. М. Санджировин дүр зѳргтә сүртә үүлдвр мѳӊкинд мартгдшго. 

841
Нет комментариев. Ваш будет первым!
Мы используем cookie. Это позволяет нам анализировать взаимодействие посетителей с сайтом и делать его лучше.
Продолжая пользоваться сайтом, вы соглашаетесь с использованием файлов cookie.