Тѳрскн теегин күӊкл дууч

Тѳрскн теегин күӊкл дууч

Хальмг олн әмтнә шүлгч Кѳлгтин Даван 100 җилин насна ѳѳн ѳѳрдҗ йовна. Ончта эн ѳдрин ѳмн А.М. Амур-Санана нертә келн-улсин дегтрин саӊгин кѳдләчнр Кѳглтин Даван санлд нерәдсн керг-үүлдвр давулсмн.

«Тѳрскн теегин күӊкл дууч» нерәдлһтә болсн поэтическ кичәлд Бичкдүдин центрин кѳдләч алдр шүлгчин бәәдл-җирһлин болн үүдәлтин тускар, энүнә насн-җирһлин хаалһд ямаран зовлӊг чигн болн байр чигн учрсн тускар, хальмг таӊгчдан кесг ач-тус кесн болн шүлгчин үлдәсн зѳѳрин тускар Элст балһсна классическ гимназин 6-гч классин сурһульчнрт тодрхаһар келҗ ѳгв.

Кичәлин йовудт сурһульчнр «Я видел всё…» презентац болн Кѳглтин Даван сәәхн хальмг келәр умшсн шүлгүднь соньмҗтаһар соӊгсҗ хәләв. «Апрель сарин алтрсн сәәхн тег!», «Үннәсн цѳкрсн угав», «Түрүн диилвринь баһд белглтн!» болн нань чигн шүлгүд сурһульчнр чееҗәр айслулҗ умшв.

Хальмг улсин цецн, гүн ухата, тоомсрта алдр нертә гисн бичәч - Кѳлглтин Дава эврәннь сарул билгәрн, урн үгәрн, ѳргн медрләрн, философск гүн ухан-тоолврта үүдәврмүдәрн нарт делкәд нерән туурулсн деерән, цуг хальмг улсиннь нер орчлӊгд медүлҗ, дуудулҗ йовсн хальмг үрн. Олн әмтнә амн-үгин зѳѳрлә бат залһлдата уйдлһта үүдәврмүдтән шүлгч ѳдрин цагин неквр-сурврт хәрү ѳгч, олнд сурһмҗ ѳгнә.

Кѳглтин Дава тѳрскн һазртан, эӊкр теегтән кесг сәәхн шүлгүд, поэмс нерәдсмн. Теднә дунд «Сар Герл» поэм, «Цецгүдин сәәх һәәхҗ…», «Ай, апрель, болһа!», «Хаврин каӊкнсн үнр теегт», «Тег мини урд зәӊгәр» болн нань чигн шүлгүд хальмг теегин сәәхнинь һәәхнә. Эн шүлгүдтән хаврин аһариг аршанла дүңцүлҗ, иим арша киилҗ бәәхләрн «Насм баһрсн болв» гиҗКөглтин Дава келсмн. Тедү дүңгә йиртмҗд, хальмг теегтән, җирһлд дурта күн бәәсмн.

Көглтин Даван бәәдл-җирһл – аһу өргн адрута хаалһ. Энүнә билгтә үүдәврмүд мана орн-нутгин меҗә һатлад, һазадын ордудт бәәдг әмтнә ухан-седкл авлсмн. Астрофизическ обсерваторьт темдглгдсн № 2296 тойгта планетд «Кугультинов»гисн нерн зүүлһгдв. Эннь һанцхн шүлгчин биш цуг Хальмг келн-әмтнә бахмҗ болҗана. Теңгрт энүнә нертә одн маднд герлтҗ,алдр билгтл «ораһарн оддт күрнә» гисиг герчлҗ, нернь мөңкрв.

450
Нет комментариев. Ваш будет первым!
Мы используем cookie. Это позволяет нам анализировать взаимодействие посетителей с сайтом и делать его лучше.
Продолжая пользоваться сайтом, вы соглашаетесь с использованием файлов cookie.